Vend om! Beste blog i 2007

Vend om!

Ole Havik Bjorkedal, 05.12.2007

Eg er sint. Eg er sur, eg er irritert, eg er djupt råka og vonbroten, eg er rett og slett djupt og inderleg forbanna. Og då meinar eg ikkje "No har maskina mi kollidert igjen, kvifor i grønaste skal ikkje driten fungere"-forbanna, heller ikkje "Nokon har lagt ein mjølkekartong i skapet mitt på fredag, sånn at alt luktar eselanal idag"-forbanna. Eg er "No står det for pokker "Skole" i den nynorske samfunnsfagboka mi"-forbanna. For det gjer det. Det står "Skole" i samfunnsfagboka mi. Den som er på "nynorsk". Eg trudde først dette dreia seg om ei trykklefse, så eg slo det opp. Det var ikkje ein tyrkfell. No har du lov å skrive "Skole" med O i midten, istadenfor "Skule" som det skal vere. Eg er så eitrandes forbanna eg kunne skrive eit blogginnlegg om det! Og det er vel strengt tatt det eg gjer.

Midt opp i dette våset om klammeformer og tilnærmingspolitikk står Noregs Språkråd og beklagar seg over at nynorsken misser brukarar, og moglegvis kjem til å døy ut snart. Er det rart Landsmålet går ad Dombås, når ein heile tida kvelar det med å tillate brukararane å skrive meir og meir likt dansk? Er ikkje det eit teikn på at ein eigentleg har gitt litt opp? Dersom ein verkeleg hadde trua på nynorsken hadde ein nekta blankt eit kvart forsøk på danskforsøpling i tilnærmingsformer, men haldt fast på sitt. Eg seier ikkje at ein ikkje skal fornye seg, eit språk må gjere det uansett. Men ein må fornye seg i rett retning. Det neste vert vel at vi kan skrive "jeg" på nynorsk eksamen. Eg får frysningar berre når eg tenkjer på det.

Måtte krafta vere med dykk!