Nye elevkort med nye tenester

Dei nye ID-korta for elevane sendes no ut til skolane. Nytt i år er at korta er grunnlaget for eit heilt nytt utskriftssystem.

Når ein set i gang ei utskrift kan ein gå til den skrivaren ein ønskjer å ta utskrifta på, og dra elevkortet på ein kortlesar som er kopla på skrivaren. Dermed blir utskrifta sett i gong når du sjølv står ved skrivaren. Det er faktisk mogeleg å ta utskrifta på ein annan skole enn ein sendte utskriftsjobben frå.

Det skal vere relativt enkelt å installere dei nødvendige komponentane, og dei fleste skrivarane vil venteleg alt kunne nyttast. Det blir laga rettleiingar for installasjon av såkalla "drivarar" på dei berbare PC-ane, som blir tilgjengeleg via Ungweb.no.

Elevane vil få kvoter med ark, og ein kan følgje med på kvotane via Ungweb. Elevkorta er lagt til rette for å kunne gi rabattar på kulturarrangement og reiser, og det er eit mål at dette kortet på sikt kan fungere som bibliotekskort.